لرسالة السابعة .. 

 صديقتي الحبيبة 

 أكتب لكِ وأنا لست بخير .. بداخلي أسئله لا أجد لها إجابه .. وشعور يجتاح نفسي وعقلي ولا أستطيع أن أتخلى عنه .. سأحاول أن أسرده لكِ .. فكل منا يحتاج أن يبتعد من فتره للأخرى حتى يستطيع  تحديد علاقاته الكثيره حوله هل هي حقيقيه أم  مجرد سراب .. وخصوصاً إذا كنت تتعامل مع كل العلاقات بقلبك وكيانك وتشعر للحظات إنك في النهايه لا تُعَامَل بالمثل أو حتى أقل .. فترى روحك تستنزف ..فتقف لست حزيناً أو نادماً بل ناصحاً لنفسك أن تُعيد حساباتك مره أخرى .. ولكني لا أنكر خوفي الشديد من إعادة الحسابات لأن أول من سيتألم لأي قرار سيكون أنا  ففي تلك العلاقات حياه بالنسبه لي .. والعجيب عدم إدراكهم لقيمتهم الغاليه .. وتعاملهم بمنتهى السطحيه والإستخفاف .. وعلاقات أخرى كنت أعتقد إنها ثابته لا تهتز أبداً .. وعلاقات لم أتخيل مجرد خيال إنها تتغير لهذا الحد من البُعد والغربه .. فكم من قريب أصبح بعيداً وكم من بعيد أصبح يخطف القلب والروح معاً .. أرى عينيك الآن وهي تقرأ سطوري وكم كانت تحذرني مرات ومرات حتى لا أغوص في بحر العلاقات .. وأسمع كلماتك دائما تهمس في أذني < إبتعدي قدر الإمكان >... هل لي من سؤال تجيبيني إياه المره القادمه !!

 لماذا يعقد البشر العلاقات الإنسانيه وهي أبسط مما يكون !!

 ولا تكلف أحد أي شئ .. بل هي ترقي النفس والروح .. وتجعل للحياه مذاق آخر لا يتذوقه إلا من كان له قلب نقي ينبض حباً وإحتراماً لمن حوله يسعد لسعادتهم ويحزن لحزنهم .. .. هل هي حقاً صعبه لهذا الحد !!

 سأنتظر إجابتك وتمني لي التوفيق في إعادة حساباتى .. أحبك صديقتي

  #ديبا___مروه


الرسالة الثامنة

 بعد كتير اوي بكتبلك .. تقريبا سنتين .. هعرفك أخباري واحاول أكون مختصره.. انا فهمت وإتعلمت الدرس ..وعرفت إن كان عندك حق .. الحب بالمعقول والود للي يستاهل الود .. مدخلش بكل كياني مع الناس.. إبعد حبه تزيد محبه  على قول صاحبتنا التالته .. إتعلمت إن اللي مش هيراعي خاطري أبعد عنه من غير كلام كتير .. عرفت إن فيه مواقف صغيره بتبين غلاوتك وقيمتك عند الناس ... وسيبت اللي عايز يفهم حاجه يفهمها مش هدخل في جدال عشان أغير فكرة أو دماغ حد .. وبقيت باتفرج على اللي بيتعامل معايا بسذاجه وبسكت ... وحمدت ربنا على تربيته ليا ... يعني من الآخر .. إتوجعت فاتعلمت ... على فكره أنا مش عايزه منك رد ولا هستناه .. ولا هستناكي انتِ نفسك ..

# ديبا___مروه


الرسالة التاسعة

 وأخيراً ظهرتي .. رديتي عليا برساله من أصل سبعه .. كنت وحشاني.. كنت خلاص فقدت انك تبعتيلي أو حتى تردي بكلمه .. بس أتاريكي شايفاني وعينك عليا .. متابعاني في كل خطوه ليا .. لما فتحت عيوني في يوم وبصيت لاقيت رساله منك حسيت إني بحلم .. مسكتها بإيدي لاقيت حروفها متشكله بخطك .. أول كلامك كان ………….. ازيك يا بنوته انت … كتبالي بتشكيلي همك !!!

 واحنا كنا دايماً نشكيلك إنت …لف الزمن ودار وإنت زي ما إنت بس احتجتي تقولي وتحكي… محتاجه انك تبعدي حبه ..تدي ضهرك لكل حاجه .. تشوفي نفسك من اول وجديد .. تكشفي المستخبي .. وتعيدي حساباتك .. طب عملتيها قد ايه قبل كده !! ..وياما لسه هتعمليها بعد كده !!!

 بتعاني من ناس حواليكي علاقات بعدت وعلاقات جدت .. ناس بتيجي وناس بتروح تشوفي حلوهم من بعيد ويدوقوكي مرهم .. طب وايه الجديد !! ومين اللي فتحلهم !! مش قلبك الطيب !! اللي يا ما حذرتك انك تحافظي عليه … وبعدين ما إنت دايماً نقطه نور وسط ناسك .. مالك !! مهدوده ليه ؟؟ شدى حيلك .. عافري .. ده انت قويه … لا تخلى حد يأثر فيكي ولا يكسرك ومين ده اللي يكسرك !!

 بصي عندي حبة تفائل الحق ادهملك قبل ما يروحوا مني واروح انا كمان معاهم … متسمحيش لأي حد إنه يهز ثقتك بنفسك .. ولا إنه يغير جميل فيكي .. دموعك وضعفك إنتِ أولى بيهم .. ويوم ما تحسي إنك ضعيفه هشه افتكريني وهتلاقيني في ضهرك وسندك اللي عمره ما هيسيبك تقعي .. الحياه مرهقه ومتعبه بس لازم نعيشها .. حبي لازم تحبي من غير الحب عيشتك مُره أوي .. خلي الحب يبان من لمعة عيونك من ضحكتك .. خليكي بسيطه زي ما انت … ومتخليش عقد العلاقات توقفك .. انت اللي صح وحتى لو كلهم غلط .. امشي بدماغك مع الناس بسطيها..  خلى قلبك الحلو وسطيهم ومعاهم بس المهم إبعدي عن اللي يأذيكي .. وهتقدري .. جرح القلوب الطيبه مش بالساهل .. ياااه كان وحشني كلامي عنك ومعاكي .. خلي بالك على نفسك وخليكي فاكراني دايماً إمضاء صديقة الروح

 #ديبا___مروه


الرسالة العاشرة.....

 لما حسيت إنك بعيده عني خفت .. إتوترت .. حسيت إن مفيش حمايه ..إتعريت . كنتي الونس .. الفرحه .. أي حد يبعد مش مهم .. بس إنتي لا.. ماهو انتي أماني وحمايتي .. وإنتي اللي مخلياني سرك ولحظات ضعفك ...وإنتي اللي ميزتيني عن باقي خلقك دلوقتي جايه تبعدي !

 طيب إبعدي .. إتمرجحي على غصون الحياه وهترجعي ماهو أصل مفيش حد هيحبك زيي أنا .. ولا هيخاف من قلبه ولا هيطبطب ولا هيفهمك من بس نبرة صوتك قدي أنا .. بس إوعي تبعدي كتير عشان لما ترجعي تلاقيني نفس قلبي وحضني وميصدوش بالبعد اللي مش فاهماله سبب.. وأوعي تكوني فاهمه إني مش حاسه ولا البعد هو بعد طرق ومسافات .. لا .. ده بعد قلبك عني أنا عارفاه ..واذا كنت ساكته فعشان أنا حافظاكي اكتر من نفسك .. وسيباكي تحسي إنى عادي ولا فاهمه.. وبلاش لما تجربي تجربي فيا أنا .. ده إنتي إتوجعتي بالكتير أوي .. إنتي اللي أنا حطيتك في مكان غير كل الناس وعليتك فوق الراس وقلت عليكي دي كلمتها على رقبتي .. أنا اللي ميزتك ومحدش كان يقدر يقلي إشمعنا .. مع إنك انتي في الأصل بتستجدعي مع كل الناس ومخصتنيش غير بكام حاجه في الأساس .. هو أنا معقول كنت مبالغه !! بس لأ .. إزاي ! 

فرحتك بيا لما كنتي بتلاقيني لما كنتي بتعرفيني باللي حواليكي .. بصوا دي صاحبتي وعزوتي وسري وسندي.. أنا مش ببالغ .. ولا كنت مبالغه .. أنا صدقتك وانتي أكدتيلي الإحساس.. هو إنتي فاكره إنى هزعل عشان بتطوفي بين الناس .. دي فرحة قلبي لما أشوفك طايره بين القلوب والكل حبك وصاينك .. بس بزعل لما ألاقيني مش في البال ولا مجرد تقضية واجب ..ولا أكون بس زي باقي الناس عشان مش هو ده الإتفاق والعهد ..يا صديقه الروح ... 

#وحشني_إتصال_الروح

 #بحبك_غاليتي #من_وحي_صوره

 #ديبا___مروه


Comments
* The email will not be published on the website.