حكايات ديدى -8



#حكايات_ديدى٢١

_باقولك ايه يا ديدى ...  كنت عاوزة اسالك عن حاجة كدا

_انا تحت امرك في اى سؤال ..

_ما تعرفيش مطعم مشويات كويس  بس يكون في البر الغربى

_اشمعنى في البر الغربى يعنى ..؟؟

_طلب الناس كدا ..   هو لو فى البلد مكنتش سالت اصلا

_ بصى هو فى مطعم فظيع مريع اكل ايه .. ونضافة ايه .. وسعر ايه

_مش مهم السعر .. اهم حاجة الطعم

_الطعم ولا احلى ولا ألذ من كدا 

 _يعنى على ضمانتك يا ديدى

 _عيب عليكى يا سوزان ..    هو انا يعنى حاغشك .. طيب ليه

_جربتيه بنفسك يا ديدى

 _لسه زباينى كانوا عنده امبارح 

 _وكان رأيهم ايه في المكان والاكل

_كانوا مبسوطين جدا .. 

_طيب تمام قوى .. طمنتينى

_وبعدين معاكى هو انا يعنى حاغشك 

_لا طبعا يا حبيبتى مش قصدى

_شكلهم مهمين الناس اللى معاكى دول 

 _ايوا فعلا يا ديدى ..   ومش عاوزة اى مشكلة او اى غلطة

 _لا ما تخافيش .. انتى حتدعى لى

_اهم حاجة عندهم مشويات متاكدة؟

_يوووووه .. ما قلت لك ايوا

_متشكرة أوي يا حبيبتى تعبتك معايا

_ ابقي قولى لهم هناك انك من طرفى  علشان بقي يتوصوا بيكى ..

_كلك ذوق والله يا ديدى  ..**********

_ازيك يا سوزان ..

_اهلا مستر شريف ازيك

_انتى ضامنه المطعم إللى احنا فيه دا

_ان  شاء الله يعجب الناس

 _انتى متأكدة ان هو دا المطعم  ..

_هو والله يا مستر شريف .. وربنا يستر

_طيب هو دا منظر مطعم سياحى

 _بصراحة لا .. بس نفس الاسم والعنوان

_طيب مطعم زى ما حكوا لك عنه كدا  يبقي بيهش وبينش كدا يا سوزان

_من غير ما تجز على أسنانك يا مستر  هما قالوا لى انه جديد .. لسه فاتح ..

_انتى عارفة ان الناس معانا دول مين

_عارفة طبعا يا مستر شريف ..

_دول اصحاب الشركة الأم في أمريكا  دول إللى فاتحين بيوت ناس كتير هنا

_والله العظيم عارفه ..

_ربنا يستر .. ربنا يستر 

_هو حضرتك طلبت الاكل ولا لسه ؟

_بصراحة.. انا قلبى مش مطمن ..    لكن مع ذلك طلبت من اول ما دخلت

 _طيب فين المتر .. اقوله يجيب لى ايه

_انا طلبت لك معانا.. عصير فريش الأول  وبالنسبة للأكل ينزل لنا كباب .. وكفته ..  وفراخ مشوية .. وخضار .. وكمان شوربة  وشوية سلطات على مزاجه

_اومال مالك قلقان ليه ..

_مش عارف الصراحة .. بس مش مطمن

_اهو جاب العصير الحمد لله

 _بدايه الله اكبر .. بسم الله ماشاء الله 

  _ايه العصير حلو للدرجة دى

 _انتى لازم تدوقى بنفسك علشان تعرفى

 _يع ايه القرف دا .. 

_مكنش لازم تتفى في وشى   علشان اعرف ان طعمه زفت

 _انا اسفة يا مستر شريف .. غصب عنى  بس دا طعمه مقرف قوى .. دا بايظ

_هو من جهة بايظ فهو بايظ لكن ..  الظريف بقي رغم أن الفاكهة فايدة  الا انهم عصروا ثمرة واحدة فقط  وحطوا عليها جردل ميه .. وصبوه لينا

_مش مهم العصير .. خلينا في الاكل

_عارفة لو تفيتى تانى في وشى .. اعتبرى نفسك في اجازة مفتوحة  دا يعنى لو الشركة نفسها فضلت مفتوحة

_والله غصب عنى يا مستر شريف

_اسكتى بقي علشان العيش وصل

 _ايه دا العيش بايت .. خليهم يغيروه

_حاضر بس كدا  ..  هات لنا يا ابنى عيش طازة لو سمحت

_ايه دا ..  دا جاب العيش البايت تانى هو هو

 _انتى تخرسى خالص .. 

_حاضر .. خرست اهو .. 

_عارفة الفراخ المجمدة منتهية الصلاحية  سلقوها  وحمروها وبقيت فراخ  مشوية  بقدرة قادر ..

_بيقولك فراخ مشوية على الفحم

 _انا مش قلت لك تخرسى خالص 

_دا شكله شاوى اللحمة بنفس الطريقة

_خليكى انتى في الكفتة المشوية حكاية

_يععععع .. دى كفتة جمعيات مجمدة 

_كفتة جمعيات مجمدة ومحمرة برضه

_انا حاكل شوربة ..    

_بلاش شوربة ..انا باقولك اهو  لان قميصى مش حيستحمل قرف

_طيب خلينا في السلطة.. 

_والله براحتك .. صفيها الأول كويس من المية بتاعتنا

_سيبنى أرفع عنك الحرج واعترف

_انتى فاكرة انى حاحوشك .. أبدا والله

_بس اعرف الأول مين اللى قالك ان  المكان الزفت دا احسن مطعم مشويات

 _ديدى هى قالت لى عليه ..  وقالت لى انها اكلت هى وزباينها فيه

_عملتها  فيكى .. علشان تبوظ لك شغلك 

_طيب ليه .. انا عمرى ما اذيتها

_دى لسه كانت مكلمانى من كام يوم كدا  علشان تاخد مطرحك في الشركة ..  فخمتوا  ولا لسه ..

_طيب والعمل ايه .. الدنيا باظت خلاص

_لا لسه .. ما باظتش انا كلمت المطعم بتاعنا يجهز لنا اكل بجد وما تخافيش انا أقنعت الناس انى كنت  عامل كدا عن قصد علشان يعرفوا الفرق بين المطاعم الجيدة والغير صالحة للاستخدام

#كائن_الديدى_عندما_يكون_مؤذيا 


#حكايات_ديدى٢٢

_الووو .. مستر هشام

 _ايوا .. مين معايا حضرتك

_انا ديدى ..

 _مش واخد بالى مين ديدى

_هو مستر حسام مش كلمك

_اه افتكرت

_انا يشرفنى اشتغل معاكم

_دا حاجة أكيدة..

_طيب هو انا حابدا الشغل معاكم امتى

_هى الحكاية بالساهل كدا

_اومال ايه ..

_ابقي عدى علينا بكرة  علشان نحدد لك ميعاد  مع HR

_وماله ..  اعدى عليكم ونبقي نشوف HR

_صباح الخير .. 

دستور  ايه يا جماعة خير  ..

_انتى مين .. وعاوزة ايه

_ انا عاوزة مستر هشام

_تفتكرى دا وقته  انتى مش شايفة ولا ايه

_بصراحة شايفة ..  هو مين دا  اللى يا حرام نازل فيكم ضرب وهبد كدا 

_وانتى مالك يا حشرية

_انا الحق عليا  صحيح خيرا تعمل ..

_نقطينا بسكاتك انتى بس   وخدى لك ساتر ..  احسن كرسى طاير ولا مكتب  ياخدك في وشه ..

_عاشت الرجولة   استخبى انت بس كويس   وما تشغلش بالك بيا

_براحتك انا عملت إللى عليا

_ قولى بس هو فين

 _هو مين اللى فين 

_ ما انا قلت لك مستر هشام 

_ما هو قدامك اهو ..

_اللى بيتضرب دا مستر هشام

_اه يا أختى إللى بيتضرب دا  هو كبير على الضرب ولا ايه 

_اللى مزنوق في الركنة دا  وبيكاكى هو مستر هشام   

 _نبيهة الله اكبر عليكى ..

*********** 

_فينه الكلب دا .. هاتوهولى

_خلاص مشى .. يا مستر

_وانا باقول هاتوهولى

  _حاضر يا افندم  حالا

_وانت يا ابنى  اتصل لى بشرطة السياحةوكلم لى سيادة اللواء عامرقولهم اننا تعرضنا لهجوم مسلح وسرقة بالاكراه

 _حاضر يا افندم 

 _وانت يا ابنى نضف المكتب ورجع كل حاجة لمكانها ..  عندى مقابلة مهمة جدا جدا كمان نص ساعة .. مش عاوز اى ازعاج لاى سبب ومش عاوز حد يدخل علينا مفهوم .. 

_مفهوم يا افندم  *******

_مستر هشام جود مورنينج

_انتى مين .. وازاى دخلتى عليا كدا ..

_يعنى دخلت عليك خلوتك

_فين البهايم إللى بره 

_اعصابك يا مستر هشام 

_اطلعى بره لو سمحتى

_هاى يا جماعة ازيكم   انا ديدى مرشدة الشركة

_شركة ايه .. انتى مجنونة ايه اليوم إللى مش فايت دا

_بالظبط كدا  تصدق انت صعبت عليا قوى لما شفتك بتنضرب من شوية

_اخرسى ووطى صوتك  حتفضحينى قدام الناس 

_اومال لو عرفت   انى سمعت حكاية السرقة بالاكراه  والتهديد بسلاح  اللى عاوز تلبسها للواد الغلبان   رغم أنه لا كان معاه سلاح  ولا سرق منك فلوس ..

_انتى عاوزة ايه خلصينى

_هو طلب صغنن قوى

_اخلصى قولى عاوزة ايه 

_الفايل الامريكانى إللى عندكم

_ماله الفايل الامريكانى إللى عندنا

_حيكون ماله يعنى .. عاوزاه 

 _خلاص .. حنبقي نرد عليكى

 _ترد عليا في ايه ..انا فاضية من بكرة وحانزل عليه 

_بس دا في مرشد عليه

_والله براحتك ..   انا ممكن استنى الشرطة   واقولهم شهادتى بما يرضى الله  أو انزل معاكم بكرة ..   ها قلت ايه سعادتك يا مستر 

_قلت ربنا ياخدك ..  انتى طلعتى لى من انهى داهية

_متشكرة خالص يا مستر هشام هو دا العشم والله


#حكايات_ديدى٢٣

_الووووو .. استاذة ديدى معايا

_ايوا .. حضرتك مين 

_انا محسن الشربيني ظابط المباحث

_والله العظيم .. انا ما ليا دعوة

_مالكيش دعوة بايه بالظبط

 _بصراحة مش عارفة .. 

_ احنا حنهزر ولا ايه يا استاذة

_لا انا قلت احتياطي يعنى يا باشا   مهو محدش ضامن الظروف ..

_باقولك ايه احنا عاوزينك

_انتوا مين وعاوزينى في ايه

 _احنا البوليس وعاوزينك في القسم

_طيب هو انا عملت ايه بالظبط

_يا ستى انتى ما عملتيش حاجة

_اومال عاوزينى ليه

 _عاوزينك في خدمة حضرتك

_اه .. مش تقول كدا من الاول 

_ها حتيجى .. ولا ايه 

_كان على عينى والله لكن ما اقدرش

_ما تقدريش ليه بس .. 

_ زى ما حضرتك عارف الدنيا رمضان

_وبعدين_وبعدين داخلين على افطار المغرب

_يا ستى افطارك النهاردة عندنا .. 

_قصدك ايه بالظبط .. لا أفهم 

_قصدى حاشترى لك الافطار بنفسى ها تحبى تفطرى ايه ..

 _مش عاوزة أغلس عليكم واغرمكم

_يا ستى غلسى علينا براحتك الموضوع بجد مهم جدا جدا

_حيث إن الموضوع مهم جدا جداانا متعودة افطر على كباب وكفته

_حاضر كباب وكفتة بس انجزى

_مش حاقدر انجز ..

_ليه بس .. خير 

_ اصل معنديش عربية توصلنى

_ ابعت لك البوكس لحد عندك 

_بوكس ايه حضرتك .. انت عاوز الناس تقول عليا ايهدا انا حد محترم فى منطقتشى

_خلاص حأبعت لك عربيتى بسواق

_ ان كان كدا ماشى .. 

_عندك طلبات تانى يا ست الكل

 _لا تمام كدا .. مؤقتا يعنى

_ طيب انجزى ابوس ايدك ..

*********    

_ايه بقي لزوووم السربعة دى كلها

_لزومها ان الست الاجنبية دى  دبت خناقة مع المحروس جوزها

_طيب وانا مالى ... هو انا جوزها 

_باقولك ايه الدنيا مقلوبة  ومش ناقصين استظراف حضرتك اسكتى شوية علشان اعرف افهمك 

_اهو .. اتكتمت .. اتفضل حضرتك

_الست بقي عملت ايه

_عملت ايه ..

_اتصلت بالسفارة وقالت لهم الحقونى  جوزى بيهددنى بمطواة وسلاح نارى

_والمطلوب منى ايه دلوقت 

_المطلوب انك تهديها دلوقت وتخليهاتتنازل عن المحضر إللى عاوزة تكتبه

_هو الواد يهمك للدرجة دى ولا ايه

_مش فكرة انه يهمنى لكن دى مصر

_يا باشا .. هى مصر تهمك قوى كدا

_عيب عليكى ..

_طيب انا حابلعها مع شوية السلطة  لكن فين الواد جوزها عاوزة اكلمه

_الواد هرب ومش عارفين راح فين   بعد ما عرف انها كلمت السفارة..

_طيب في حد من اهله هنا ..

_اهله كلهم هنا وإخوانه كمان 

_سيبنى مع إخوانه شويه لوحدنا   وبعدين خلينى اتكلم مع الست مراته  لوحدنا برضه .. وما تدخلش حد علينا 

_حاضر يا ست.. اى أوامر تانية حضرتك

************

_بصراحة انا كنت سامع انك داهية   لكن مكنتش مصدق غير لما شفتك

_حاعتبرها  مجاملة من حضرتك

_ انتى اقنعتى أهل الولد انهم يدفعوا   لك عشرة آلاف جنية علشان ينقذوه   دى ممكن افهمها .. لكن   اللى مش قادر افهمه ولا استوعبه    هو ازاى انتى قدرتى تقنعى الست    بانها تتنازل عن المحضر بسهولة كدا   وكمان تكلم السفارة وتقعد تضحك    معاكى وتهزر ولا كأن حاجة حصلت

_ دى بقي بالذات سر المهنة يا باشا ..   وكل إللى يهمك ان المصلحة خلصت    لكن دا حصل ازاى .. مالكشى فيه ..  وبعدين يا باشا حد يقول للخير لا

 يتبع .........

تأليف

 استاذة \ عزة لطفى

 مرشدة سياحية و روائية

 صفحة حكايات ديدى 


 

Comments
* The email will not be published on the website.