View My Stats

حكايات ديدى -6



#حكايات_ديدى_١٥

_الووو يا خالد ،، صباح الخير يا حبيبى

 _حمدى الشنهورى بذات نفسه ،، أنا مش قادر اصدق ودانى

_لا صدق يا حبيبى ،، هو أنا ليا بركة غيرك

_إطلع من دول يا اونطجى ،، وقولى ايه فكرك بيا 

_بصراحة كدا سمعت أن عندك مرشدة من الآخر

_يا ابنى احنا شركة للرجال فقط ومعندناش اى مرشدات

_ليه كدا بس يا خلوود ،، دا أنا دايما كنت واقف معاك ولا نسيت الجمايل

_يا عم ولا نسيت ولا افتكرت   بس احنا فعلا ما بنشغلش ستات معانا    وأنت عارف كدا كويس ومن زمااان

_اومال ست الكل ديدى بتعمل عندكم ايه في الشركة

_ست الكل ديدى بتعمل مصايب كوارث بلاوى

 _هو دا  إللى أنا عاوزه بالظبط يا حبيب قلبى

_عاوز ايه بلاوى وكوارث ومصايب

_ايووووا يا حبيبى ،، أنا عاوزها ببلاويها ومصايبها

_ليه يا عم أنت ،، مين إللى زعلك للدرجة دي

_واحدة زبونة طلعت عنين إللى خلفونا   جيبنا لها أقوى مرشدين في مصر واشتكتهم ،،  حجزنا لها أحسن فنادق في البلد طلعتهم فشنك  حتى العربيات احدث موديل في مصر   قالت لنا ايه العربيات الكهنة  إللى انتوا باعتينهالى

 _طيب يا مستر حمدى أنا تهت منك بجد   ايه علاقة ديدى بالوليه القرشانة دى

 _علاقة وثيقة يا خلود يا حبيبى   بس ركز أنت شوية وأنت تعرف العلاقة 

  _علاقة ايه بس اللى حاكز فيها

 _أهدأ بس عليا يا خلووود يا حبيب قلبىأنا مش عاوز منك غير الأستاذة الدكتشورة ديدى 

_حتهبب بديدى ايه عاوز اعرف 

_على فكرة يا خالد    أنا لو عاوز اجيب رقمها الف من يدلنى     بس أنا قلت ما ينغعش اتصل بيها     وهى شغالة معاكم من غير ما اكلمك واستئذنك الاول

_أصيل يا حمدى بس والله الاستاذة الفاضلة ديدى مش شغالة معانا

_ازاى بس ،، دا ناس كتير اكدولى أنها معاكم

_هو انت طلعت منهم يا حمدى

_هما مين دول إللى طلعت منهم يا عم أنت

_قصدى الجماعة بتوع الناس اكدولى والناس فهمونى


_افهم من كدا أنك مش عاوز تتدينى رقم ديدى

_أنا خايف عليك والله يا حمدى دا أنت لسه حتى معايرنى بجمايلك إللى مغرقانىوإن كان على رقم ديدى لو اتصلت بشرطة السياحة وطلبته من اصغر عسكرى حيديهولك ،، بس فهمنى أنت عاوزها في ايه المصيبة دى

_عاوزها تطلع البلاء الأزرق على جتتة البلوة إللى اتحدفت علينا و قارفانا في عيشتنا دى

_إذا كانت اشتكت أقوى مرشدين مصر  حتعمل ايه في الدكتشورة ديدى

_هى كدا كدا حتشتكى ،،   يبقي على الأقل اشفي غليلى فيها واسيب ديدى تاخد حق الغلابة إللى اشتكتهم

_أن كان كدا ماشى طبعا ديدى بعد ما طلعت الزيارة مع الزبونة وخلصت شرحواديتها فري تايم ،، قعدت ترغى مع واحدة صاحبتهالحد ما سمعت صوت ناس بتصوت وبتتخانق

_يا لهوووى ايه الصوت دا هو في حد بيتخانق في المعبد_

الحقي يا ديدى ،،  دى الزبونة إللى معاكى بتتخانق مع واحدة مرشدة   ومسكوا في خناااق بعض

_في ايه يا جماعة ما تصلوا على النبي ،، دا انتوا حتى في معبد

_الست الكافرة إللى معاكى دى فارشة في أرض المعبد  وعمالة تتعبد وتصلى للالهة 

_أيوا يعنى انتى بتتخانقى معاها علشان كافرة ولا علشان بتتعبد وبتصلى للالهة

_علشان بتصلى جوة المقصورة ودى مش مكان عبادة

_طيب خلاص أنا حافهمها غلطها بس بالراحة عليها

_امسكى يا ديدى الصندل بتاعى وقربان الإله دا لحد ما اجيب الست دى من شعرها 

_الطيب احسن يا حاجة ،، ودى برضه مهما كانت مرشدة زميلة

 _علشان خاطرك انتى بس يا ديدى يلا بينا من هنا قبل ما أفقد إيمانى واجيب لكم مصيبة

_يلا بينا يا حبيبتى ،، دا ألف معبد يتمناكى

_طيب إيدك بقي على الصندل بتاعى والقربان بتاع الإله

_صندل ايه وقربااان ايه مش فاهمة

_الصندل دا إرث عائلى بنتوارثه من جيل لجيل    وعمره حوالى 200سنه   ومصنوع من جلد غزال برى نادر أن لم يكن منقرض   والقربان دا كان للالهة المصرية وفي كل معبد باقرا عليه الصلوات   علشان أقدمه لأمى المريضة بناء على نصيحة من كاهن المعبد     إللى بنقيم فيه الطقوس الخاصة بعائلتنا حلو الكلام

 _ياااااه حلو طبعا الكلام   دا أنا مكنتش اعرف ان الحاجات دى مهمة قوى كدا

_ايوا طبعا بس هما فين الحاجات دى

_والله أنا مكسوفة منك بجد ومش عارفه اقولك ايه   تقريبا من زعلى بعد الخناقة رميت الصندل في المية   واكلت ولا مؤاخذة القربان المقدس

_بتقولى ايه رميتى الصندل واكلتى القربان

_ايوووون حصل

_اااااه قلببببببى_الحقونا يا نااااس  الوليه ماتت منهم لله إللى كانوا السبب

#ديدى_اكلت_القربااان#المرشد_الديدى_رزق


#حكايات_ديدى١٦

_يا إبراهيم احنا لازم نتصرف وبسرعة كمان ...   شكلنا حيبقي وحش جدا لو الزباين ما راحتش محلات

_أيدى على كتفك يا أمجد ،، بس حنعمل ايه يعنى   الزبائن رافضة ومحدش فيهم عاوز يروح اى حته خالص

_يا جماعة احنا الشركة حتنفخنا مش كدا   تلات مجموعات كبار ومحدش مننا عارف يظبط اى مصلحة  والله عيب علينا ،،

_يا حسن لو سمحت نقطنا بسكاتك حنعمل ايه يعنى نكهرب الزبائن مثلا .. علشان الشركة ترضى عننا ..  وبعدين احنا لو ضغطنا على الزبائن شوية كمان   الزبائن دى ممكن تروح تشتكينا في الشركة والشركة حتبعينا وش طبعا  .. ونشيل احنا الليلة

_طيب والحل ايه 

_صباح الخير يا جماعة ،، إزيك يا إبراهيم .. إزيك يا أمجد ،، إزيك يا حسن

_الحمد لله ،، هو حضرتك تعرفينا 

_الصراحة لا

 _اومال عرفتى اسامينا منين 

_هى اساميكم بس إللى عرفتها ،، دا أنتوا حالتكم تصعب على الكافر والله

_هو حضرتك مين بالظبط 

_أنا الدكتشورة ديدى  مرشدة زميلتكم  لكن ممكن تقولوا لى ديدى عادى من غير ألقاب

_ماشى يا ست ديدى من غير ألقاب   حضرتك عاوزة ايه مننا دلوقتى

_وأنا حاعوز ايه منكم يا اخ إبراهيم      دا أنتم إللى حتعوزوا منى

 _حنعوز ايه بقي أن شاء الله

 _بصراحة أنا كنت  قاعدة في حالى لا بيا ولا علياصوتكم وأنت بتولولوا خرم طبلة ودنى ،،وبصراحة كدا صعبتوا عليا فقررت أساعدكم

_بارك الله فيكى واحنا في غنى عن مساعدتك

_استنى بس يا حسن لما نشوف هى عاوزة ايه

_أستنى ايه بس يا أمجد هو أنت مجنون

_عاقل يا مستر أمجد ،، اشتروا منى يا جماعة

_أتفضلى بيعى يا ست الكل

 _انتوا معاكم تلات مجموعات رافضين يروحوا  أى محل الشركة  إللى بإذن الله حتنفخكوا ،، صح ولا لا

_صح طبعا

 _طيب واللى يقنع زباينكم أنهم يروحوا ويشتروا كمان

_وحتعمليها أزاى دى 

_لا دى بتاعتى أنا دى ،، بس إللى أوله شرط آخره نور

_فهمينا الأول وبعدين أتشرطى براحتكانتوا الأول معاكم كام زبون

 _كل واحد فينا معاه عشرين زبون

_حلو أنا حاخد على المجموعة 4000جنية

_انتى مجنونة ،، مين بقي إللى حيديكى 4000 جنية ..وليه

_معانا من النهاردة لحد بكرة علشان نبدأ الخطةأنا حاكلم واحد تبعى حيجهز لنا 70 تذكرة 60تذكرة لزباينكم وعشرة لزباينى

_تذاكر ايه احنا مش فاهمين اى حاجة خالص

_في متحف بردى لسه جديد لسه عاملاه الحكومة  بيحكى قصة صناعة البردى في مصر القديمة واحنا حنكون من اوائل الناس إللى حنزور المتحف دا تذكرة المتحف دا 200جنية للفرد و300 للتصوير

 _يا بت اللذينة ،، طيب ودول حنقنعهم ازاى

_ما قلت لكم سيبوا الحكاية دى عليا .. اطمنوا

_حتعملى ايه بس فهمينا ،،

_حاقنع زباينى الأول بالمتحف وبعد ما ينبهروا حاقولهم أن الزيارة دى منى ببلاش وتمت التذاكر عليا  لو قدروا يقنعوا باقي الزباين على المركب  بأنهم يكلموا مرشدينهم ويروحوا معانا  ودى طبعا خدمه لمصر ...

_وبعدين أنا اخد أنا زباينكم واضربكم عندهمواقولهم انى حاودى زباينى مكان رائع ومتحف جميلمش اى مرشد بيروحه ،، المرشدين البروفشينال بسفطبعا زباينكم حيولعوا الدنيا ويطلبوا منكم تودوهم

_فاحنا نوديهم طبعا على هناك على طول

_ولا مؤاخذة يعنى يا أمجد يا اخويا كدا تبقي غشيم_اومال حنعمل ايه 

_حتقولهم ساعتها أن المتحف دا مش في البرنامجوأنك لو عملته حتعمله على مسؤوليتك الخاصة ودا حيكلفنا عربية وتذاكر بتتحجز مقدموتسيبهم يتحايلوا عليك شويه قبل ما توافقوساعتها بقي نبقي نلم كوست العربيات والتذاكر

_طيب انتى حتاخدى تمن التذاكر احنا بقي حنكسب ايه

_عيب عليك هو أنت ما تعرفش أن المتحف دا  عامل نسخ من القطع الاصليه الموجودة فيه  ولحسن حظهم لأنهم من اوائل الناس اللى زارت المتحف وكنوع من الدعاية للمتحف الجديد ..و المتحف طبعا قرر بيبيع النسخ دى وبأسعار لا تقارنيلا يا ابراهيم انت و امجد و حسنكل واحد فيكم  يضرب اخوه بالقلمو بعدين يضرب تعظيم سلام لست الكل هى صحيح حلانجية واونطجية سفيههسيكوباتية .. ولسانها يستاهل قطعهلكن جنب رزايلها .. وبلاويها .. ومصايبهاعليها ملعنه في تظبيط المحلات والاوبشنالاتمتخليش اي شركه سياحة  تفرط فيها  ( بصوت عباس فارس)

#ايدك_ابوسها_يا_ست_الكل#اهم_من_الشغل_تظبيط_الشغل 


#حكايات_ديدى١٧

طراااااخ.. طاااخ .. طرااااااااخ

_ في ايه يا جدع انت ..   بالراحة على العربية حتكسرها  هو انت مجنون ولا ايه؟

_انت معاك مرشدة ؟؟  قول .. اعترف .. اتكلم بسرعة

_هو في ايه يا دفعة بالظبط ..  هما بيقفشوا المرشدات ولا ايه ؟

 _انت حتهزر معايا .. اخلص باقولك

_ايوا يا عم معايا مرشدة ..  ما يبقااش خلقك ضيق اوووى كدا

 _هي فين المرشدة دى

_هى فين ازاى ..ما هى قدامك اهى *****************

_هو انت المرشدة ..

_هو للدرجة دى مش باين عليا

_طيب بتعرفى تتكلمى عربى

_قصدك باعرف اتكلم انجليزى

_لا انا عاوز مرشدة بتتكلم عربى

_اه باعرف اتكلم عربى مكسر

 _طيب كويس   يلا بينا بقي على حضرة الظابط 

 _هو في ايه ..  انا مش فاهمة حاجة خالص منك

_ لما نروح لحضرة الظابط    هو بقي حيفهمك كل حاجة ******************

_ يا افندم انا مش فاهمة حاجة 

_ يا آنسة  ..  انتى بتحبى مصر مش كدا_اكيد طبعا يا افندم بحب مصر    دى مصر هى أمى ..    نيلها جوا دمى ..   شمسها في سمارى   حتى لونى قمحى   لون خيرك يا مصر

 _والله مش وقته يا ست عفاف راضى

_معلش يا افندم .. اخدتنى الحماسة شوية .. انا تحت امرك 

_بصراحة شديدة يا آنسة ..  مصر محتجاكى

_انا تحت امر مصر فى اى حاجة   يا حبيبتى يا مصر .. يااااا مصر

_شايفة الست المنتقبة اللى هناك دى

_اه مالها

_مصر عاوزاكى تفتشيها   علشان احنا شاكين انها ارهابى 

_طيب وانا مالى ..

_مش بتقولى انك بتحبى مصر 

_ما هو احنا برضه ما اتفقناش على كدا

_ هو احنا حنهزر ولا ايه    يلا بقي علشان ماعندناش زفت وقت   لو الست دى طلعت ارهابى ..    مصر مش حتسامحك أبدا    وعموما ياستى العمر واحد والرب واحد    واشهد ان لا الله الا الله  

 _ لا استنى اشهد ان لا إله الا الله ايه

_انا اسف هو حضرتك مش ...

_ مش قصدى يا افندم    انا بس كان نفسي  اتجوز واخلف   ووعد منى اخدم مصر بعنيا

_انتى بتستعبطى يا انسه .. اخلصى   احنا مش فاضيين للدلع دا ************

_ بص يا عمو الإرهابى    والله العظيم .. والله العظيم   انا مش معاهم ..     انا حتى كنت مقدمة ع هجرة   هو انت  ليه مش بترد عليا .. ها   هو انت مش مصدقنى .. ولا ايه

_انا مش ارهابى انا اسمى منال

_وانا اسمى ديدى  ..  احنا كدا بقينا اصحاب مش كدا  ارجوكى بلاش تموتينى 

_اموتك ليه بس .. هو انا اعرفك

_ مش انتى جاية تفجرى المكان

_لا انا في كلية آداب قسم آثار   وكنت جاية اذاكر في المعبد   بس قلت البس النقاب بتاع اختى  علشان احمد اخويا ما يشوفنيش

_يعنى إللى في الشنطة دى مش قنبلة

_لا دى كتب تاريخ وآثار

 _طيب وما قلتيش ليه للظابط إللى برهالحكاية دى قبل ما يتهوروا ويقتلوكى

_علشان احمد ما يضربنيش لو شافنى  اصلى جاية من وراه ..

_هو احمد اخوكى واقف مع الناس دى

_الظابط إللى كان بيكلمك هو احمد اخويا

_يكشى تولعى انتى وهو يا بعيدة ..  سيبتى مفاصلى .. وكنت حاعملها ع نفسي

#كله_تمام_يا_باشا

#قبضنا_على_الارهابى_وطلع_منال

#ديدى_تنقذ_مصر_من_البت_منال 

يتبع .........

تأليف 

استاذة \ عزة لطفى 

مرشدة سياحية و روائية 

صفحة حكايات ديدى


Comments
* The email will not be published on the website.