View My Stats

حكايات ديدى -4



#حكايات_ديدي9

_صباح الخير يا خواجات يا حلويين 

_صباح الخير يا ديدي 

_بصوا بقي يا حلويين انتوا لكم عندي مفجأة انما ايه لوز اللوز

_مفچأة ايه يا ديدي ,, عاوزين نعرف ايه هي المفجأة بسرعة

_زي ما انتوا عارفين يا جماعة النهاردة يوم فري ,,   يعني معندناش زيارات ولا يحزنون _دا صحيح يا ديدي ,,   ايه عندك مناطق حلوة ممكن نشوفها النهاردة

_,مناطق  ايه بس ,,   انتوا اكيد زهقتوا من المعابد والمقابر والكلام الفاضي دا

_طيب حنعمل ايه بس في اليوم الفري دا ,   حنركب مركب ولا نعمل لفة في البلد بالحنطور _كل دا كلام عادي ,, السياح كلهم بيعملوه ,,  انا قررت اعملكم حاجة محدش عملها ولا حيعملها غيركم

_ايه بقي اللي محدش عمله ولا حيعمله غيرنا 

_الصبح حاعملكم #ميتم_بارتي ,, وبالليل حنحضر #فرح

_واو فكرة عبقرية يا ديدي ,, معقول حنحضر فرح وميتم مصري تقليدي و في نفس ذات اليوم

_ونفس ذات اللحظة يا خواجة كمان لو حابين

_احنا موافقين يا ديدي ,, كلنا رايحين معاكي_هي الحكاية بالساهل كدا ,, الحكاية محتاجة تجهيزات يا جماعة 

_تجهيزات ايه يا ديدي ,, مش فاهمين

_اولا اللي حيروح الفرح ايده علي30 دولار ,,   واللي حيحضر الجنازة 30 دولار ,, اما بقي اللي حيحضر  الاتنين فاعمل له تخفيض وحيدفع خمسين دولار امريكي فقط لا غير

 _كلنا معاكي يا ديدي ,, احنا كلنا حنروح الاتنين

_طيب ايدكم علي الفلوس يا حلوين ,,  وقدامكم ساعة زمن علشان تلحقوا الدفنة ,, واللي معندهاش طقم اسود محترم تطلع عند صلاح في البازار بتاع الهدوم اشتري لها جلابية سودا وطرحة ,, عاوزين نلتزم بالاصول يا جماعة


#حكايات_ديدي10

_يلا يا حلويين نوقف في الصف علشان اتمم عليكم    واتاكد ان كل حاجة تمام

_كل حاجة تمام وزي الفل يا ديدي يا حبيبتي    يلا بقي عاوزين نلحق #الجنازة_بارتي من اولها

_لا يا حبيبتي انا لازم اتاكد بنفسي ,وعموما ما تقلقيش علي البارتي ,,  الجنازة عندنا بتبقي 3 ايام 

_واووو 3 ايام وانتوا بتحتفلوا بالميت 

_واووو ايه يا حاجة انتي ,, دا احنا كدا بقينا بنكروته ,,   فين ايام البارتيهات اللي بجد ,,   لما كنا نولول ونتشحتف لحد الاربعين  وبعد الاربعين السنوية الاولي والعاشرة والعشرين    لحد ما العيلة الكريمة كلها تحصله بإذن الله

_طيب واحنا حنعمل ايه يا ديدي ,,   احنا عاوزين نشارك في طقوس الجنازة 

_وماله يا حبيبتشي كله بتمنه يا ضينايا

_طيب ودلوقت حنعمل ايه فهمينا 

_الاول نشوف العبايات لازم تكون طويلة وحشمة   وما فيش ركبة باينة ولا كوع بارز وممنوع اي حاجة بتلمع ولا بتبرق والشعر الاصفر دا يتداري ما اشوفش شعرايه صفراء هنا ولا هناك 

 _كله تمام يا ديدي ,, يلا بقي 

_طيب والاخوة الرجال اللي معانا الجلاليب تحتها صديري حشمة والكوفية تكون سوداء لازم  ولا بد

_كله تمام يا ديدي ,, جلاليب بلدي وكوفيات وطواقي انجزي بقي

_لا ,, انا ما بحبش حد يستعجلني ,, الاصول اصولوعموما كدا ما فاضلش غير اني اعلمكم اصول الجنازاتطبعا ما فيش وقت اعلمكم فنون الولوله والشحتفه والشلشلة واللطيمات واهم حاجة اللطيمات دي علشان كدا عاوزة الستات تركز معايا انا حاصوت وانتوا ورايا تلطموا وتقولوا بوووووو ,, عرفتوا حتعملوا ايه يا حلويين ??

_حنلطم ونقول بووووووو يا ديدي بووووووو_الرجال بقي ,, انا جيبت لكم هيثم اخويا الصغير حيعلمكوا تسبلوا وتحضروا معاه الدفنه والخرجه وتحضروا معاه العزا في ديوان العيلة وما تخافوش انا وصيته ياخد باله منكم ويتوصي بيكم في صواني العزا ,, الغدا دا ببلاش حاجة مني كدا لوجه اللهيلا بينا بقي ,, زمان الواد ابن المرحوم اللي مستنينه قرب  يرجع من السفر ,, وما ننساش يا حلوين ,, النظام والالتزام مش عاوزة اوصيكم .. وانتوا خلاص عرفتوا حتعملوا ايه


#حكايات_ديدى11

_يلا يا حلويين نغير الأسود ونجهز بالعريان والمشخلع  واوعوا تنسوا تكتروا الترتر علي قد ما تقدروا ،،   عاوزاكم تنوروا في الضلمة وتشرفونى في الفرح بالليل

_ديدى احنا المفروض حنعمل ايه في الفرح بارتى دا    احنا مش فاهمين حنعمل ايه ولا حنتصرف ازاى    وخايفين نعك الدنيا

 _اخص عليكى يا ماريكا ،، لا والله أنا كدا ازعل منك بجد  هو أنا ممكن يعنى ابعتكم مكان من غير اجهزكم وادربكم   وعلي أعلي مستوى كمان ، يرضيكى يعنى الناس تأكل وشى  وتقول انى خليتكم تحضروا فرح مصرى   من غير ما تكونوا علي مستوى الحدث  دا أنا اتصلت لكم  بالاستاذة ميمى ملبن   والست مشكورة وافقت أنها تديكوا كورس مكثف     ساعتين قبل ما تستعدوا للحفلة 

_كورس في ايه يا ديدى ،، احنا مش فاهمين_كورس في الرقص الشرقي ،، أحنا الأفراح عندنا كداكل إللى يحضر يهز يا قمر

_يهز ايه بس يا ديدى ،، احنا ما بنعرفش نرقص شرقى

_اومال الست ميمي فايدتها ايه ..   دى احسن مدربة رقص في البلد كلها  انتوا بس اسمعوا كلامها وحتلاقوا نفسكوا بترقصوا لوحدكم

_يلا بقي علشان تلحقوا الكورس وتجهزوا للفرح

_حبيبتي يا ديدى والله مش عارفة من غيرك كنت عملت ايه

_عيب عليكى يا ميمي والله ،، أنا معملتش غير الواجب

_أزاى بس يا سكر ،، دا مين غير أفكارك الجهنمية  كان زمان أصحاب الفرح أكلوا وشى ،،  بعد ما بنات الفرقه سابونى ومشيوا قبل الفرح بيوم

_حبيبتى ولا يهمك ،،   بس إيدك علي الخمسة الآلاف إللى اتفقنا عليهم

_أنا لو عليا اديكى اكتر والله   دا كفاية الواجب إللى عملوه معايا زباينك   دول صيتونى سنه قدام ،،   وكل الناس بقيت تتكلم عن ميمى ملبن وفرقتها  الناس صدقت أنهم فرقتى الجديدة كلها أجانب  والحجوزات نازلة تررف عليا  عاوزاكى تظبطينى بقي مع زباينيك الجايين   وليكى الحلاوة

_حلاوة ايه بس يا ميمي يا اوختشي ،،    احنا بس بنوفق رأسين في الحلال

يتبع .........

تأليف 

استاذة \ عزة لطفى 

مرشدة سياحية و روائية 

صفحة حكايات ديدى


 

 

 

Comments
* The email will not be published on the website.