View My Stats

حكايات ديدى -2



#حكايات_ديدي4

_الووو,, الشركة العالمية للسياحة الروسية 

_ ايوا يا افندم ,, اي خدمة

_معاك سيادة اللواء حسام حسين المنشاوي    قائد المنطقة العسكرية الشرقيه الشماليه

_ تشرفنا يا افندم ,, حضرتك تؤمر 

_هو سؤال واحد  ما فيش غيره

_تحت امرك يا افندم ,, اتفضل

_في دكتورة محترمة اشتكت لي انكم مش بتشغلوها معاكم ,,  وانا كنت حابب اعرف السبب

_حضرتك دي شركة سياحة  ,,  المستشفي  العام نفس الرقم  بس اخر رقمين عندهم خمسين ,, واحنا اخر رقمين عندنا صفرين

_خمسين ايه وصفرين ايه يا ابني ,,  انا مش سالتك اذا كان دا رقم الشركة العالمية للسياحة الروسية  ,, وقلت ايوا  الرقم صح

_ ايوا صحيح  ،، بس حضرتك اللي لخبطتني والله   دكتورة مين دي اللي مش بنشغلها معانا _الدكتورة ديدي

 _نعم يا حاج ,, ديدي ايه دي كمان

_ احترم نفسك ,, واعرف انت بتكلم مين_ اسف والله يا افندم .....   بس هي ديدي اخدت الدكتوراه امتي ،، والله ما اعرف

_مش هو دا المهم ,,  المهم انتوا ليه مش بتشغلوها معاكم  دي انسانة فاضله وعندها ظروف صعبة وماساوية

_تصدق بايه يا باشا ,, انا .. ومدير الشركة .. ومرشدين الشركة .. والبواب الواقف علي باب العمارة اللي فيها الشركة ,, كلنا عندنا ظروف ماساوية سعادتك ,, طيب حتي اسال علينا في السوق كدا حتلاقي الناس كلها عارفة ان عندنا ظروف ماساويةدا طبعا بغض النظر يعني عن اننا شركة سياحة روسية والدكتورة ديدي تخصص انجليزي دا يا مرسي 

  _معني كلامك انكم مش ناويين تشغلوها معاكم في الشركة 

_هو احنا كشركة لو مشغلناش الدكتورة ديدي معانا ,, هل دا حيكون فيه ضرر علي الامن القومي لجمهورية مصر العربية

_تييييييييييييييت (صوت قفل التليفون قبل ما يخترعوا الموبايلات علشان الموبايل بيقفل عادي من غير اي صوت )


#حكايات_ديدي5

_باقولك ايه يا حسن ,, عاوزاك في مصلحة

_عيوني ليكي يا ست ديدي ,, يا كيداهم

_هو دا ,, عاوزاك تثبت علي وضعك

_وضع ايه ولا مؤاخذة , انا مش فاهم حاجة

_وضع يا كيداهم ,, يا حارقاهم ,, يا مولعاهم

_من عونيا الجوز ,, انتي تؤمري طبعا

_عاوزاك تركز معايا يا حسن ,, وانا حاظبطك

_وانا معاكي يا كبيرة من ايدك دي لرجلك دي

_بكرة عندنا شغل مع مجموعة مصريين مهمين قوى ,, حلو الكلام 

_كلام جميل ,, والمطلوب ايه يا ست الكل

_المطلوب تقولي قدامهم يا دكتورة

 _وماله تقولك يا دكتورة هي يعنى أول مرة , بس بكام??

_ما تبقاش انسان مادي يا حسن

 _والله يا ست الكل كلك نظر ,, وانا خدامك ,,  شوفي انت الدكتور دا علشان ياخد اللقب بيدفع كام واوعى تنسي انى صيتك قبل سابق لما كلمت لك الشركة وقلت لهم انى سيادة اللواء قائد المنطقة العسكرية الشمالية الشرقيه

_كنت حتودينى في داهية يا حمار  ،، هو في حاجة اسمها شمالية شرقيه

_اه طبعا فيه ،، أنا أخدتها زمان في حصة الجغرافيا 

_عاوز كام خلصني  .. وما تصدعنيش

_نقول ورقة بمتين جنية مصري فقط لا غير

_نعم يا عمر ,, هي مية جنية واحدة فقط لا غير وتظبطني 

_طيب ايدك بقي علي المية جنية علشان اظبطك 

_بعد الحفلة ما تخلص يا ظريييف

 _وانا موافق ,, بس ايدك علي العربون 

_من غير عربون ,,وبطل رغي وركز معايا كويس علشان تعرف انت حتقول ايه قدام الناس ,, 

_عاوزاني اقولهم ايه يا كيداهم 

_,عاوزاك تصيتني قدامهم وتفهمهم اني انا دكتورة كبيرة قوووي في السياحة وكمان كل المرشدين اللي علي الساحة دلوقت تتلمذوا علي ايديا ,, وطول عمري باشتغل مع امريكان وبس ,, ودي اول مرة اتنازل واشتغل مع مصريين بعد ما الشركة اتحايلت عليا  وباست ايديا كمان

_كل الكذب دا يا ست الكل  ,, وبمية جنية بس

 _ومش حيزيدوا مليم احمر واوعي تفتكر انك انصح مني

_يا ست ديدى دكتورة وقلنا ماشي ,,   لكن امريكان مين اللي ما بتشتغليش غير معاهم ,,   ومصريين مين اللي اتنازلتي واتكرمتي علشان تشتغلي معاهم

_ايه مش عاجبك ,, هو انا باكذب يعني

_لا سمح الله يا ست الكل ,, هو انتي وش ذلك  طيب تصدقي بايه انا من يوم ما عرفتك وانا عمري ما شفتك مع أمريكان خالص مالصوبالنسبة للمرشدين اللي اتدربوا علي ايديكي ,, دول فين دول دربتيهم امتى وفين بس  ،، فهمينى

 _مالكش دعوة انت تعمل اللي باقول لك عليه وبس

_امرك يا ست الكل يا. كيداهم

_احنا قلنا ايه يا حسن

_معلش نسيت يا دكتشورة


#حكايات_ديدي6

_احنا بنحبك اوي يا مروة انتي فعلا مرشدة محترمه مش زي ديدي

_الله يكرمك يا جوليا ويبارك لك في المحروس جوزك

 _انتي مرشدة سياحية محترفة ,, مش نصابة زي ديدي

_والله انتم اخجلتم تواضعي يا جماعة  بس هي مين ديدي اللي مزعلاكم اوووي كدا

_انتي ازاي ما تعرفيش ديدي يا مروة ,,  دي مرشدة مشهورة اوووووي  اوووووي_مرشدة مشهورة اوووي وانا معرفهاش   معلش يا جماعة اعذروا جهلي ,,  اذا كنت باشتغل في السياحة من يجي15 سنة وعمري ما سمعت ان في مرشدة اسمها ديدي 

_ازاي ,, دي قالت لنا انها مرشدة كبيرة ومشهورةوكل المرشديين تتلمذوا علي ايديها ,,

_كل شئ جايز يا جوليا يا حبيبتي   غالبا دي حتطلع مرضعة فرعون ,,,  اللي شربتنا حب التاريخ والاثار ,,,,,, بعد لحظة صمت قصيرة  ,,,,,,

_ يعني يا مروة انتي متاكدة انك ما تعرفيش ديدي

_اطفحها لو كنت اعرفها ,, هو انا لو اعرفها حاخبي ليه بس_مروة ,, بصي يا مروة ,, بسرعة يا مروة

_ابص علي ايه يا جماعة ,, زلزال ولا بركان ولا شيطان مالكم في اييييه 

_ديدي هناك اهي يا مروة ,, ديدي هناك اهي

 _طيب اهدوا بس مش عارفة اشوف حاجة من دوشتكم  انا مش شايفة ايتها ديدي يا جماعة

_ديدي اللي عند التمثال اللي عند مدخل المعبد هناك اهي 

_مش شايفة حاجة ,, والله بجد

 _يا مروة المرشدة اللي ماسكة شمسية فوشيا ولابسة بلوزة بمبي علي جزمة صفراء ,, هنااااك دي

_بس دي ما اسمهاش ديدي خالص

_هي قالت لنا ان اسمها ديدي ,, هو انتي تعرفيها  

_الا اعرفها ,, عز المعرفة 

_انتي ازاي تعرفي مرشدة مش كويسة زيها يا مروة

_حاقولكم بس علي شرط ,,    تحكوا لي ايه اللي حصل معاكم بالتفاصيل 

_ امبارح كان عندنا زيارة في البر الغربي ,, حلو الكلام

_كلام جميل ,, ها وبعدين

_ولا قبلين ,, مايكل كان عاوز يشرب فنجان قهوة ديدي قالت لنا ما فيش كافيهات ولا كافتريات هنا لكن ممكن نزور ناس قرايبي .. ممكن يعملوا لنا قهوة وببلاش كمان ,, انا ومايكل قلنا ,, فرصة حنشرب قهوة وببلاش وحنشوف قرايب ديدي كمان فوق البيعة ,, المهم وصلنا المكان لقينا نفسنا في محل لبيع الهدايا ,, فين قرايبك يا ديدي ,, قالت لنا هما دول قرايبي ,, انا ومايكل اتصدمنا لانها كانت مفهمانا اننا حنزور قرايبها في بيتهم ,,  قامت قالت لنا هنا احسن تشربوا قهوتكم ,, وتعملوا شوبنج في نفس الوقت ,, مايكل حاول يفهمها بالذوق ,, انه ما بيحبش النوع دا من الهدايا ,, وانه فعلا مش محتاج يشتري حاجة ,, وكل اللي هو محتاجه فنجان قهوة ,,  قامت قالت له حاضر القهوة حتجهز في خمس دقايق ,, بس خد لك لفة علي ما تجهز 

_وبعدين ,, حصل ايه يا جوليا ,, احكي لي يا حبيبتي

_ ولا قبلين ,, خلصنا القهوة واللي بصراحة كانت حلوة قوي فؤجنا بقي بديدي بتقولنا ايه ,, ايدكم بقي علي 300 جنية يا حلويين ,, بتوع ايه دول يا ديدي ,, دول تمن القهوة اللي شربتوها ,, بس انتي قلتي لنا ان القهوة ببلاش يا ديدي ,, القهوة ببلاش فعلا لو كنتم اشتريتم اي حاجة ,, لكن بما انكم ما اشترتوش ,, يبقي من الذوق انكم تتدفعوا ,, طيب مش شايفة ان 300 جنية مبلغ كبير علي كوبيتين قهوة ,, احنا لسه شاربينها في فندق خمس نجوم بخمسين جنية ,, هي دي التسعيرة هنا ,, ولو مش معاكم انا حادفع لكم ونبقي نتحاسب بعدين ,, لا معانا الفلوس ,, ديدي بعد ما اخدت الفلوس قالت لنا نستناها خمس دقايق حتروح تدفع الفلوس للولد اللي عمل القهوة وترجع لنا علي طول ,, شوية ودخل لنا الولد اللي قدم لنا القهوة ,, فانا وجوزي قلنا له شكرا قوي علي القهوة الجميلة ,, تسلم ايدك ,, واحنا دفعنا تمن القهوة لديدي ,, الولد تنح شوية ,, وبعدين قلنا تمن ايه ,, القهوة دي ببلاش ,, وبعدين مين ديدي دي ,, شوية ديدي رجعت وقالت لنا يلا علي معبد حتشبسوت ,, داخلين انا ومايكل حنموت من الغيظ ,, شوية ولقينا علي يمينا كافتيريا كبيرة والناس قاعدين عليها عادي ,, لقيت مايكل بينفجر فيها ,, وقالها انتي قلتي لنا ما فيش كافتيريات هنا ,, اومال دي ايه ,, وقلتي لنا حنروح نزور قرايبك ,, واخدتينا محل هدايل ,, وقلتي لنا القهوة ب300 جنية ,, والولد اللي هناك قال لنا انها ببلاش

تخيلي بقي يا مروة حد في الموقف الزبالة دا ممكن يعمل ايه

_عملت ايه شوقتيني

_ههههههه فضحتنا ,, قالت لنا اننا اجانب زبالة وما نستاهلش انها تشرح لنا اي حاجة ,, وان العلم اللي عندها خسارة فينا ,,واحنا ازاي ما يكونش عندنا ثقة في المرشدة بتاعتنا ونكذبها ونصدق حته عيل بتاع قهوة ,, ومكنش قدامنا غير اننا نتصل بالشركة ونحكي لهم اللي حصل من ديدي وطلبنا منهم نغير المرشدة فورا ,, والحمد لله ربنا كرمنا بيكي يا مروة


يتبع ................

تاليف 

أ \ عزة لطفى 

مرشدة سياحية وروائية 

صفحة حكايات ديدى   


 

Comments
* The email will not be published on the website.