View My Stats

حكايات ديدى




#حكايات_ديدي1

_صباح الخير يا مستر خالد ,,انا اسف علي ازعاج حضرتك بس في مرشدة سياحية برة مصممة تشوف سعادتك

_مرشدة مين ,, هو احنا بنشغل مرشدات معانا في الشركة وانا معرفش

_ والله يا مستر خالد حاولت امشيها بالذوق لكن ما عرفتش_طيب دخلها نشوف حكايتها ايه دي كمان

 _صباح الخير يا مستر خالد ,, انا ديدي مرشدة انجليزي ,, عاوزة اشتغل معاكم 

_ والله يا افندم ,, حضرتك احنا شركة سياحة روسية ,, ومعندناش زباين انجليز اصلا علشان ننزلك معاهم ,, وحتي لو عندنا ,, فالشركة دي ما بيشتغلش فيها غير المرشدين الرجاله سعادتك 

_ يا افندم حرام عليك ,,انا محتاجة الشغل دا .. انا عندى ظروف صعبة والله العظيم  ..

_يا استاذة شركات السياحة الإنجليزية فى البلد كتير

_بس انا عاوزة اشتغل معاكم انتوا بالذات ..انا لو ما اشتغلتش معاكم انتوا بالذات ..انا ممكن ارمي نفسي من الشباك حالا

_ تعالى هنا يا مجنونة انتى رايحة فين .. الله يخرب بيتك .. انتى عاوزة تجيبى لى مصيبة على الصبح ولا ايه

 _ هو حضرتك بتعاملني كدا ليه ,, (شوية عياط وشحتفه لزوم الصعبنيات )

_باعاملك ازاي بس ,, هو انا اصلا اعرفك. قبل كدا ولا عمري شوفتك ,, وبعدين احنا ما بنشغلش ستاااااات ,, اقسم بالله ما بنشغل معانا ستات

_ ما بتشغلوش ستات ليه ,, هو احنا جربه سعادتك ,, طيب جربني ومش حتندم ,,, والنعمة عندي ظروف صعبه اوووي   انا مش باشحت سعادتك ,, هي الظروف بس اللي صعبه ,, وحياة عيالك يا شيخ

 _طيب يا ستي خلاص ايه لزوم البكاء والعياط دلوقت ,,يا احمد لو سمحت في كام زبون اوكراني بيتكلموا انجليزي اديهم للاستاذة 

تاني يوم الاستاذة طلعت الشغل مع الشركة في اتوبيس كبير كله زباين روسي ,, ومعاها الاتنين الاوكراني في اخر الاتوبيس وبما ان المرشد الرئيسي في الاتوبيس مرشد روسي ,,والزباين الاوكراني هما كمان بيفهموا روسي فالمرشد الروسي كان ماسك المايك وعمال يشرح لزباينهشوية والست ديدي اللي عندها ظروف نزلت نفخ ,, لقيت المرشد اللي معاها برضه مكمل شرح ,, قامت علت الليفل شوية ,, وابتدت تخبط وترزع ,, برضه المرشد ما فهمش هي عاوزة ايه ,,

 قامت بكل بجاحة وقفت قالت له ,, علي فكرة دي قلة ذوق حضرتك ,, ازاي تاخد المايك لوحدك ,, انت شويه وانا شوية 

_شوية ايه حضرتك ,, الاتوبيس بتاعي والزباين اللي فيه كمان ,, احنا ادينالك اتنين اوكراني شفقة بظروفك ,, وبعدين حتشرحي لمين انجليزي والاتوبيس كله روسي

 _طيب والله لاقول للاستاذ خالد ,, انك اخدت المايك مني ومش عاوز تديني دوري ,, انا طالعة النهاردة معاكوا مخصوص علشان امسك المايك


#حكايات_ديدي2

_صباح الخير يا مستر خالد ,, انا عاوزة اشتكي لك من ايمن واحمد ,, حضرتك لازم تتصرف معاهم ...

_ايمن واحمد مين حضرتك !?

_ ايمن مرشد الروسي اللي كان معايا في الباص امبارح مرديش يديني دوري ويمسكني المايك شوية

_نعم يا اختي ,, سوري قصدي نعم يا ديدي 

_ ايوة حضرتك ,, اللي عمله دا ممكن يسئ لسمعة الشركة ,, وممكن كمان حد من هيئة حقوق المرأة يشم خبر انكم بتمارسوا اضطهاد وعنصرية ضد المراة ,, وصدقني دا مش كويس علشانكم 

_ دا ايمن حضرتك ,, طيب وبالنسبة لاحمد هبب ايه في الليلة السودا دي

_احمد ما رديش يديني تيشيرتي .... 

_ احمد انسان مهذب ومحترم وانا باعتبره في مقام ابني واكيد في سوء تفاهم في الموضوع ,, لان احمد مش بتاع الحاجات دي يا استاذة ديدي

_ حاجات ايه وسوء تفاهم ايه حضرتك ,, الاستاذ رفض يسلمني تيشرت الشركة ,,  اليونيفورم الرسمي لمرشدين الشركة سعادتك 

_ تيشيرت ايه ,, ويونيفورم ايه سعادتك ,, دول هما اتنين زباين عمي ,, طلعتي معاهم امبارح ,, وحتكملي معاهم لحد بكرة وشكرا علي كدا

 _ ازاي يعني الزباين تعرف اني مرشده الشركة ,, دي مسالة مبدأ سعادتك_من الواضح ان حضرتك مش فاهمة ,, وخليني اجيبها لك علي بلاطة انتي مش مرشدة الشركة

 _كان قلبي حاسس وعلشان كدا انا عملت باصلي واخدت اللوجو بتاع الشركة وعملت لي احلي تيشرت علشان اشرفكم قدام الزباين

 _حضرتك حتشرفينا بشغلك وبشرحك يا استاذة ,, مش بالتشيرت ,, ولو سمحتي بلاش تلبسي التيشرت بكرة ,, علشان اللي بيلبسه بيكون محسوب علي الشركة ولازم يكون واحد من طاقم مرشدينها

 


#حكايات_ديدي3

_الحقنا يا مستر خالد

 _حصل ايه يا وش الخير

_مصيبة يا افندم 

_ايه يا ابني الشركة ولعت!?

_لا يا افندم ,, دي ديدي

_ايه ديدي ولعت ?!

_لا يا افندم ,, ديدي نزلت صورتها علي الفيس

_يخرب بيتك علي بيت ديدي ,,    مالي انا ديدي تنزل صورها علي الفيس   ولا حتي تنزل صورها علي الانستجرام 

_ما هي نزلت صورها وهي لابسة يونيفورم الشركة  وواقفة مع مرشدين الشركة

_سنتك مطينة بطين ,, مين الحمار اللي اداها  تيشرت الشركة 

_محدش اداها حاجة يا افندم دي عملت تيشيرت علي حسابها

_لا وايه كمان عامله احلي دعاية للشركة يا افندم ,, اللوجو بتاع الشركة ولا اجدع يافطة محل عصير قصب حضرتك

_ولك نفس كمان وبتهزر 

_لا دا واقع حضرتك مش هزار ,, اومال حتعمل ايه لو عرفت باقي القصة

_هي القصة كمان لها باقي ,,

_اه طبعا ,, دي فضلت تقفش في مرشدين الشركة واحد واحد ووقفتهم صف كدا جنب بعض ووقفت في نصهم علشان تاخد اللقطة ونزلت الصورة وفوقها بالبنط العريض ,, فاكهة الشركة

_فاكهة ايه هو احنا في شادر ,, يعني انا لسه رافض طلب من مدير الامن علشان اشغل بنت اخته معانا وقلت له الشركة ما فيهاش ستات خالص ,, وكلهم خناشير وانوثتها ممكن تتبعتر وسطهم ,, وقبلها باسبوعين رفضت طلب من رئيس المباحث علشان واحدة قريبته عاوزها تشتغل معانا ,, تقوم الهانم منزله صورتها بيونيفورم الشركة وتفضحني ,, عاوزة تحبسني بنت **** ,, طيب يا انا يا الهانم ديدي في الشركة

 _يا باشا ما تاخذنيش انت اللي غلطان ,, هو في حد يعمل معروف في واحدة اسمها ديدي برضة


يتبع ..................

تأليف 

أ \  عزة لطفى 

مرشدة سياحية وروائية  

صفحة حكايات ديدى


Comments
* The email will not be published on the website.